Dathlu'r prentisiaid gorau yn y rhanbarth yng Ngwobrau Prentisiaeth Coleg Caerdydd a'r Fro 2026

Mae gwaith caled a phenderfyniad pump ar hugain o’r prentisiaid gorau sy’n gweithio yng Nghymru wedi cael eu clodfori yng Ngwobrau Prentisiaeth Coleg Caerdydd a’r Fro 2026.

Cafodd cyflogwyr ac ymarferwyr sydd wedi mynd yr ail filltir o ran eu hymrwymiad i ddysgu seiliedig ar waith eu cydnabod hefyd yn y seremoni, a gynhaliwyd yng Nghampws Canol y Ddinas y Coleg, dan arweiniad Jason Mohammad, un o gyn-fyfyrwyr CCAF.

Cynhaliwyd Gwobrau Prentisiaethau CCAF yn ystod Wythnos Genedlaethol Prentisiaethau, er mwyn cydnabod cyflawniadau prentisiaid ar draws rhwydwaith CCAF o 18 o isgontractwyr prentisiaeth arbenigol, sy'n hyfforddi mwy na 3,400 o ddysgwyr yn y gwaith ar draws 50 o sectorau diwydiant. Mae rhestr lawn o’r enillwyr i’w gweld isod.

Dyma’r 18 o is-gontractwr: Prentisiaethau CCAF, KwikFit, Focus On Training, Clwb Pêl-droed Dinas Caerdydd, JTL, Hyfforddiant Tydfil, Bosch, Grŵp JGR, NDGTA, ProTech, Pengwin, Remit Training, People Plus, Gwasanaeth Tân ac Achub De Cymru, Hyfforddiant Diogel a Chyfyngedig, Sgil Cymru, Skillnet a Hyfforddiant Coleg QS.

Dywedodd Sharon James-Evans, Pennaeth CCAF: “Fel y darparwr prentisiaethau mwyaf yng Nghymru, mae Grŵp CCAF mor falch o’n henillwyr. Rydyn ni'n credu ym mhŵer prentisiaethau oherwydd ein bod ni'n gweld y canlyniadau bob dydd – ac mae pawb sydd wedi ennill gwobr yn profi pa mor arloesol y gallant fod. Llongyfarchiadau mawr i chi gyd!”

Eleni llwyddodd dau i ennill Gwobr Prentis Cyffredinol y Flwyddyn: Abdullah Mohammad a Lara Condy.

Mae Abdullah, a enillodd y Wobr Adeiladu hefyd, wedi creu argraff enfawr mewn cyfnod byr, gan gael ei enwebu droeon am wobrau yn ystod ei gyfnod gyda'i gyflogwr Curtins, a chael ei gydnabod fel un o’r rhai a gyrhaeddodd rownd derfynol Gwobrau G4C 2024. Mae ei waith o safon uchel wedi arwain at roi cyfrifoldeb sylweddol iddo mewn prosiectau mawr gan gynnwys gofal iechyd, treftadaeth a chadwraeth, gan wneud cyfraniad ystyrlon i Gymru.

“Mae fy amser fel prentis wedi bod yn arbennig iawn,” meddai Abdullah. “Mae cwrdd â phobl drwy fy ngwaith a digwyddiadau cymdeithasol wedi ei gwneud hi’n haws i fwynhau’r pethau rwyf wrth fy modd yn eu gwneud.

“Rwyf wedi cael cynnig cymaint o gyfleoedd yn sgil y cysylltiadau rwyf wedi’u gwneud yn ystod fy mhrentisiaeth, mae hi gymaint anoddach creu cysylltiadau drwy’r llwybr traddodiadol. Mae nifer y disgyblaethau o fewn y diwydiant fel arfer yn cael eu rhoi mewn un categori ar gyfer coleg neu brifysgol a all ei gwneud hi'n anodd dewis llwybr gyrfa.”

Byddai Abdullah yn bendant yn argymell dilyn llwybr prentisiaeth.

“Y profiad yn ôl pob tebyg yw’r ffordd orau o symud ymlaen ar eich llwybr gyrfa a mwynhau’r pethau rydych chi’n eu hoffi, ac mae penderfynu ar y llwybr rydych chi am ei gymryd yn llawer cliriach pan fyddwch chi wedi cael blas ar yr amgylchedd.

“Mae cael profiad o’r amgylchedd adeiledig yn hytrach na cheisio ei ddeall drwy ddamcaniaeth wedi ei gwneud hi’n haws i mi gyflawni fy nodau a’m huchelgeisiau. Mae'r brentisiaeth hefyd wedi ei gwneud hi'n haws gosod uchelgeisiau newydd, lle mae popeth wedi'i gynllunio ac mae modd cael cefnogaeth bob amser gan wahanol weithwyr proffesiynol.”

Dangosodd Lara, enillydd y wobr Gweinyddu Busnes, ymrwymiad a phroffesiynoldeb eithriadol drwy gydol ei phrentisiaeth yn Deloitte, ac roedd hi’n cymryd rhan yn gyson yn llawn brwdfrydedd ym mhob cyfle dysgu. Fel Llysgennad y Gymraeg ar gyfer 2025/26, roedd Lara yn falch o hyrwyddo prentisiaethau a dwyieithrwydd ar draws y rhanbarth. Mae hi bellach yn cefnogi prentisiaid a mentoriaid newydd gan fanteisio ar y ffaith ei bod yn rhugl yn y Gymraeg, ac mae'n fodel rôl rhagorol.

“Rydw i wrth fy modd ac yn falch iawn o ennill y wobr!” Dywedodd Lara. “Mae wir yn golygu popeth i mi, er na fyddwn i wedi gallu ennill heb gefnogaeth fy mentoriaid, tiwtoriaid a chydweithwyr. Rydw i mor ddiolchgar am yr holl gyfleoedd mae'r brentisiaeth hon wedi'u rhoi i mi, ac rydw i wir yn edrych ymlaen at ddefnyddio popeth rydw i wedi'i ddysgu yn fy ngyrfa yn y dyfodol.

“Rydw i wedi mwynhau fy amser fel prentis gyda CCAF a Deloitte yn fawr iawn – mae wedi bod yn brofiad gwerth chweil. Fe wnaeth y cyfuniad o ddysgu academaidd a phrofiad ymarferol roi cyfle i mi ddatblygu sgiliau gwerthfawr, cyfrannu at brosiectau go iawn a chreu rhwydwaith o bobl anhygoel na fyddwn i wedi cwrdd â nhw fel arall.”

Byddai Lara hefyd yn argymell dilyn prentisiaeth.

“Yn bersonol, roeddwn i wedi rhoi cynnig ar y llwybr academaidd traddodiadol cyn dod o hyd i’r brentisiaeth hon, ac fe wnes i ddysgu’r ffordd galed nad oedd prifysgol yn addas i mi,” eglurodd. “Mae fy arddull ddysgu, fel llawer o bobl eraill, yn fwy ymarferol ac mae prentisiaethau’n wych ar gyfer hyn gan y gallwch chi astudio eich cwrs ochr yn ochr â gweithio a meithrin sgiliau ymarferol amrywiol a phrofiadau gwaith go iawn.

“Rydw i bob amser wedi mwynhau helpu eraill a thrwy’r brentisiaeth hon rydw i'n rhan o dîm gwych sy’n rhannu fy ngwerthoedd a’m rôl fel Cynorthwyydd Gweithredol lle gallaf gefnogi fy nghyfarwyddwyr bob dydd. Mae'r llwybr prentisiaeth wedi rhoi cyfle i mi nad oedd ar gael i mi fel arall heb ddilyn cwrs gradd – gan na ddilynais gwrs gradd, rydw i mor ddiolchgar.

Enillodd Hayley Carpenter, Hyfforddwr ac Aseswr CCAF mewn Cyflwyno Prentisiaethau Dysgu Seiliedig ar Waith, a Cerys Howells, Cynorthwyydd Gweinyddol, Tîm Datblygu Gweithrediadau yng Ngwasanaeth Tân ac Achub De Cymru, y wobr Ymarferydd Dysgu Seiliedig ar Waith y Flwyddyn ar y cyd, am eu cefnogaeth arbennig i brentisiaid, a'r gwerth y maent wedi'i ychwanegu at eu sefydliadau.

Cafodd cyflogwyr sy'n gwneud ymdrech arbennig i annog a chefnogi prentisiaid eu cydnabod hefyd. Sef Admiral, ecube, Lloyd Morris Electrical Ltd, Persimmon Homes, Cartref Gofal Tŷ Ross a Chyngor Bro Morgannwg.

Aeth Sharon James-Evans, Pennaeth CCAF yn ei blaen: “Hoffwn longyfarch yr holl enillwyr: y prentisiaid gwych sydd wedi gweithio mor galed; y cyflogwyr sy’n buddsoddi yn eu staff, yn meithrin ac yn datblygu talent; a’r hyfforddwyr, aseswyr ac athrawon talentog a gweithgar o bob cwr o CCAF a’n rhwydwaith o isgontractwyr sydd wedi eich cefnogi.

“Rydyn ni i gyd yn gwybod bod prentisiaethau’n gweithio – i feithrin talent newydd a phresennol, i amrywio gweithluoedd, i rymuso busnesau i dyfu ac addasu, ac i gefnogi ein cymunedau a’n heconomi. Mae'n ddyletswydd arnom ni i gyd i barhau i hyrwyddo'n angerddol yr effaith maen nhw'n ei chael."