Mae Jack Grey, Newyddiadurwr Iau ar gynllun prentisiaeth sy'n cael ei redeg gan Goleg Caerdydd a'r Fro mewn partneriaeth â BBC Cymru Wales ac ITV Cymru, wedi cyrraedd y rhestr fer ar gyfer Gwobr Sgŵp Fawr gan y Cyngor Hyfforddi Newyddiadurwyr Cenedlaethol.
"Mae'n dda iawn, iawn cael fy enwebu gan fod y gwobrau yma’n cael eu cynnal ledled y DU felly mae'n wych gweld fy enw i gyda phawb arall," meddai Jack. "A hefyd mae gweld enw o Gymru yn beth da achos does dim llawer ohonon ni ar y rhestr."
Jack yw un o’r criw cyntaf o brentisiaid Newyddiaduraeth Ddigidol mewn rhaglen a ddarperir gan y Coleg gyda’r BBC Academy ac ITV Cymru. Y llanc 23 oed o Abertawe oedd un o'r rhai cyntaf yn y lleoliad pan dynnwyd cerflun y gŵr busnes a'r masnachwr caethweision Edward Colston i lawr ym Mryste yn ystod un o'r protestiadau a sbardunwyd gan lofruddio George Floyd yn America yr haf diwethaf.
"Roeddwn i yn y brotest ym Mryste ar fy liwt fy hun, nid fel rhan o’r cwrs, ac fe ddechreuodd pethau fynd yn ddyrys," esbonia Jack. "Fe wnes i estyn fy nghamera a ffilmio'r cerflun yn cael ei dynnu i lawr.
“Fe wnes i roi’r ffilm ar trydar, gan ddweud ei fod gan y BBC, ac wedyn fe gefais i lu o geisiadau am ei defnyddio ym mhob man. Roeddwn i wedi synnu – fe wnes i dreulio gweddill y pnawn yn delio gyda negeseuon e-bost ac yn anfon copïau at bobl.
“Roedd yn braf bod yn rhan o rywbeth sydd wedi mynd rownd y byd ers hynny.”
Ac o ganlyniad, mae NCTJ wedi gosod Jack ar restr fer y categori Sgŵp Fawr yn ei Wobrau Rhagoriaeth ar gyfer 2020, a fydd yn cael eu cyhoeddi y mis yma.
Mae Jack yn teimlo bod ei brentisiaeth wedi bod yn gyflwyniad ardderchog i newyddiaduraeth – diwydiant y mae'n anodd iawn cael mynediad iddo.
"Mae'r darlithwyr a'r tiwtoriaid wedi bod yn dda iawn ac mae hefyd wedi bod yn dda gweithio a dysgu ar yr un pryd," meddai. "Mae'n golygu bod yr hyn rydych chi wedi'i ddysgu yng nghyd-destun swydd go iawn – mae'r rhan fwyaf o'r bobl sy'n rhan o’r cynllun wedi gweithio ym maes newyddiaduraeth, rhai ar lefelau uwch, felly rydych chi'n cael budd o'u profiad nhw.
"Pan fyddaf yn gorffen y cwrs yma byddaf yn cerdded i mewn i swydd ym maes newyddiaduraeth ac rydw i'n gwybod fy mod yn teimlo y bydd fy sgiliau i'n ddigonol ar gyfer y swydd."
Mae'r cwrs yn sicr wedi rhoi cyfle i Jack ddechrau ar yrfa yn y cyfryngau, rhywbeth nad oedd yn credu fyddai'n digwydd byth.
"Mae bob amser yn rhywbeth rydw i wedi bod â diddordeb ynddo ond doeddwn i byth yn ystyried newyddiaduraeth fel gyrfa addas – ysgrifennu ar gyfer y teledu efallai neu rywbeth felly," meddai. "Wedyn fe ddois i ar draws y brentisiaeth roedd y BBC yn ei chynnig ac roeddwn i'n meddwl y byddwn i'n rhoi cynnig arni.
"’Fyddwn i ddim eisiau gwneud unrhyw beth arall nawr yn sicr – mae'n dda bod ganddyn nhw gynlluniau fel hyn fel bod pobl sydd heb raddau neu raddau meistr yn gallu cymryd rhan – pobl fel fi."
Dywedodd Dirprwy Bennaeth Coleg Caerdydd a'r Fro, Sharon James: "Rydyn ni i gyd wrth ein bodd gyda'r ffaith bod Jack wedi cyrraedd rownd derfynol y categori Sgŵp Fawr yng Ngwobrau Rhagoriaeth NCTJ. Mae'r Brentisiaeth Ddigidol rydyn ni'n ei rhedeg mewn partneriaeth â BBC Cymru Wales ac ITV Cymru wedi'i chynllunio i helpu pobl i ddod o hyd i yrfa mewn newyddiaduraeth, pobl na fyddai wedi cael y cyfle fel arall efallai – ac mae meddwl cyflym ac ymddygiad proffesiynol Jack yn ystod yr haf yn dangos bod y brentisiaeth yn cael canlyniadau.
"Da iawn i Jack a da iawn i bawb sy'n gweithio ar y rhaglen – mae hyn yn dyst i'ch holl waith caled a’ch ymrwymiad."